У Івацэвічах на адкрыцці помніка ўзнялі расійскі сцяг, поп расказаў пра «развал вялікай краіны». Ідэолаг выканкама: «Нічога кепскага няма»
Суботай 22 ліпеня ў Івацэвічах адкрылі помнік беларусам, што служылі ў ваенна-марскім флоце.
Увагу грамадскасці да гэтай падзеі прыцягнуў расійскі сцяг, які падымалі на адкрыцці нароўні з беларускім, а таксама словы мясцовага праваслаўнага святара: ён наракаў, што «некалі вялікую краіну разбурылі па волі ворагаў», а таксама сказаў, што «ўсе мы — рускія».
Фота з адкрыцця помніка ivatsevichy.by.
«Наша Ніва» дазванілася да намесніка старшыні выканкама Івацэвічаў Аляксандра Вялікасельца, які адказвае за ідэалогію і браў удзел у арганізацыі адкрыцця.
Мы спыталіся, што ўсё гэта значыць? У інтэрнэце ўжо крытыкуюць.
«У інтэрнэце кашамолы, якім абы б дачапіцца, — сказаў Вялікаселец. — Я вам адразу скажу датычна расійскага сцяга, што былі нейкія сумневы перад гэтым, думкі… Але ўлічваючы, што запрошана шмат людзей… Аташэ запрасілі расійскіх, была маці падводніка Дудко, загінулага на «Курску». Ну і што Расія стала пераемніцай усяго савецкага флоту… Таму мы падумалі, што нічога тут кепскага няма».
Шкадаванне праваслаўнага бацюшкі пра развал СССР івацэвіцкі ідэолаг пракаментаваў так:
«Што датычыць айца Рыгора, то гэта, хутчэй, рэлігійная думка. Адзіная царква праваслаўная, «народ рускі» — мелася на ўвазе старажытнай Русі, Кіеўскай Русі. Цяпер жа нельга казаць Кіеўская Русь? Бо Украіна ж не вітае. Гэтыя словы яго… Гэта яго асабістая думка, я так скажу, не дзяржаўная. Ён шмат дапамагаў сродкамі, плітку ўзяў невядома адкуль.. Мы ні капейкі не ўклалі. Што, калі ён пачаў гаварыць, я павінен быў сказаць, што ён штосьці не так робіць? Вы ж ведаеце — Руская праваслаўная царква, яна адзіная», — патлумачыў нам Вялікаселец.
