Google два гады сакрэтна распрацоўвала новыя «разумныя» акуляры, якія хутка паступяць у продаж
Кампанія Google, якая больш за два гады таму спыніла продаж першай версіі сваіх акуляраў дапоўненай рэальнасці, мае намер зноў пачаць продажы палепшанай версіі гэтых смарт-акуляраў, праўда, толькі для бізнесу.
Google заяўляе, што ў Glass Enterprise Edition (так называецца новая мадэль) павялічаны тэрмін службы батарэі, і акуляры будуць зручнейшымі пры працяглым нашэнні.
Вонкава новыя акуляры па-ранейшаму нагадваюць арыгінальную мадэль з невялікім празрыстым дысплеем і ўбудаванай камерай.
Навінка будзе канкураваць, сярод іншага, з Microsoft HoloLens.
Многія меркавалі, што пасля леташняга сыходу ў адстаўку выканаўчага дырэктара кампаніі Тоні Фадэла праект «разумных акуляраў» наогул будзе зачынены.
Аднак падраздзяленне «Х» мацярынскай кампаніі Alphabet працягвала развіваць гэтую тэхналогію і нядаўна паведаміла на навінавым сайце Medium аб сваіх апошніх дасягненнях.
Як дадае часопіс Wired, усе, хто працаваў над праектам, абавязаліся трымаць у сакрэце існаванне Glass Enterprise Edition і для ўсіх фатаграфій пазіраваць ў старых акулярах.
На гэты раз акуляры будуць прадавацца праз кампаніі, якія спецыялізуюцца на праграмным забеспячэнні і якія будуць прапаноўваць іх як частку пакета разам з іншымі сваімі паслугамі. Кампанія Ubimax, якая базуецца ў Германіі і стварае праграмнае забеспячэнне для вытворчай сферы і дастаўкі, паведаміла Бі-бі-сі, што будзе браць за свой пакет каля 1500 еўра, не лічачы абаненцкай платы.
