«Арт Сядзіба» і symbal.by пераязджаюць на новае месца
Наваселле адсвяткуюць ужо ў жніўні па адрасе праспект Машэрава, 18, куды культурная арганізацыя ды крама перасяляюцца з гандлёвага цэнтра «Маскоўска-Венскі».
«Гэта першы наш пераезд па ўласнай волі», — адзначае заснавальнік ды кіраўнік Павел Белавус. Прычына на гэты раз пазітыўная і жыццёвая: на квадратных метрах «Маскоўска-Венскага» ім стала цесна.
«Symbal.by стане вялікай крамай для ўсіх беларусаў і цікавым месцам для турыстаў. Тут жа будзе працаваць наш офіс, пункт самавывазу і служба дастаўкі. Адрас па суседстве зойме «Арт Сядзіба» — новае атмасфернае месца на мапе Мінска, з кавярняй, дзе можна будзе пачаставацца кавай, гарбатай з зёлкамі, узяць ці пакінуць беларускамоўную кнігу, з'есці смачны круасан, проста пасядзець за камп'ютарам або сустрэцца з цікавымі людзьмі. Зразумела, што там будуць праходзіць літаратурныя сустрэчы, лекцыі, кінапрагляды, прэзентацыі кніг і не толькі», — дзеліцца планамі Павел.
Макеты таго, як усё будзе выглядаць.
Побач з артсядзібаўцамі знаходзіцца культурны цэнтр «Корпус» і арт-прастора «Верх», у справе арганізацыі мерапрыемстваў яны збіраюцца аб’ядноўвацца.
Адчыніць свае дзверы для наведвальнікаў сядзіба і крама плануюць у жніўні, як толькі скончыцца рамонт. Працаваць будуць штодзённа. Пакуль жа ў штатным рэжыме працягвае работу інтэрнэт-крама symbal.by
