Жыхары Бранявога і Вайсковага завулкаў адбіліся ад ушчыльнення
Жыхары дамоў у Бранявым і Вайсковым завулках змаглі паўплываць на прапанову архітэктараў па развіцці іх квартала: надбудоўваць мансардныя паверхі дарагім трохпавярховым сталінкам і ўшчыльняць двары дзіцячымі садкамі ў цэнтры горада не будуць, паведамляе Tut.by.
Грамадскае абмеркаванне праекта кварталаў ля плошчы Перамогі ў межах вул. — вул. Фрунзе — прасп. Незалежнасці — вул. Казлова — вул. Платонава — вул. Чапаева завяршылася ў канцы чэрвеня. Па праекце, нагадаем, архітэктары прапанавалі надбудаваць мансардныя паверхі ў чатырох сталінках, ушчыльніць два двары дзіцячымі садкамі, пабудаваць гаражы-стаянкі.
На прэзентацыі праекта жыхары дамоў выступілі катэгарычна супраць прапаноў архітэктараў. А пазней напісалі не адзін калектыўны зварот у адміністрацыю Партызанскага раёна з просьбай улічыць іх меркаванне.
Жыхары дома № 10 па Вайсковым завулку ў сваім звароце напісалі, што яны катэгарычна супраць знішчэння зялёнай зоны ў двары свайго дома дзеля будаўніцтва дзіцячага садка. А мансардныя паверхі знішчаць гістарычную значнасць квартала.
«Высечка зялёнай зоны — гэта ліквідацыя маленькіх «лёгкіх» дадзенага сектара, што значна пагоршыць умовы і якасць жыцця жыхароў квартала, у асноўным пенсіянераў», — пішуць у сваім звароце жыхары дома.
Жыхары дома № 4 у Бранявым завулку таксама напісалі калектыўны зварот. У ім яны адзначаюць, што ў двары іх дома растуць унікальныя шматгадовыя здаровыя дрэвы, высечка якіх была б відавочным варварствам і вяла б не толькі да пагаршэння экалагічнай абстаноўкі, але і да ўзнікнення сацыяльнай напружанасці. Тым больш што высечка дрэў дзеля будаўніцтва дзіцячага садка — нелагічнае рашэнне: у квартале некалькі старых дзіцячых садоў раней аддалі пад офісы.
Адміністрацыя раёна калектыўныя звароты разгледзела і адправіла прапановы жыхароў у камітэт архітэктуры і горадабудаўніцтва. Там вырашылі:
— выключыць з праекта рэканструкцыю шматкватэрных дамоў з надбудовай мансардных паверхаў па завулку Бранявым, 10, 12, 13, і завулку Вайсковым, 13;
— выключыць з праекта будаўніцтва дзіцячых садоў па завулку Бранявым і на вуліцы Захарава.
