Тыя, хто будзе пасля людзей: топ-5 самых сучасных робатаў
З года ў год мы чуем усё больш навінаў, звязаных з прасоўваннем высокіх тэхналогій і шучнага інтэлекту ў нашае жыццё. Некаторыя асабліва ўражлівыя ва ўвесь голас вяшчаюць аб будучым паўстанні машын — адным з сцэнараў развіцця тэхнакратычнага грамадства. Паглядзіце нашу падборку з пяці чалавекападобных робатаў і самі вырашыце, ці ўяўляюць яны пагрозу грамадству, ці з’яўляюцца ўсяго толькі карыснымі (ці бескарыснымі) прыладамі ў нашых руках.
1. Robobuilder 5720T
Гэты маленькі робат вышынёй 30 см наўрад ці дапаможа вам у сур’ёзнай справе, бо ён створаны ў адукацыйных і забаўляльных мэтах. У камплекце да робата ідуць 16 прывадных модуляў і шмат іншых дробязей накшталт светадыёдаў. Усталяваўшы на смартфон спецыяльны дадатак, можна праграмаваць робата выконваць розныя дзеянні, тым самым пашыраючы свой досвед стварэння алгарытмаў.
2. UXA90
Гэты хлопец вышынёй адзін метр ужо куды цікавейшы для робатабудаўнікоў з досведам. Машына мае ўбудаваны камп’ютар і даволі цікавыя фунцыі, такія як захаванне раўнавагі пры дапамозе ўбудаванага гіраскопа і магчымасць трымаць прадметы ў сваіх верхніх канечнасцях. Ён нават можа згуляць з вамі ў мяч і ўвогуле рабіць усё, на што вы здольныя яго запраграмаваць.
3. Nao
Гэты сімпатычны робат быў створаны ў Францыі. Найноўшая яго версія, Nao Next Gen, з'явілася ў снежні 2011 года. Мае рост 58 см і шырока выкарыстоўваецца ў розных навучальных установах свету ў якасці аднаго з найбольш сучасных праграмуемых робатаў. Гэты робат здольны размаўляць з вамі на некалькіх дзясятках моваў, а калі яго пагладзіць, абавязкова падзякуе вам, бо мае шмат сенсараў на сваёй паверхні.
4. Asimo
Калі папярэднія робаты адносіліся да класу праграмуемых машын, гэта значыць здольных выконваць толькі вашую праграму, робат Asimo, які распрацоўваецца канцэрнам Honda, з’яўляецца ўжо самым сапраўдным робатам-андроідам. Робаты-андроіды, або робаты-гуманоіды, — сінтэтычныя арганізмы, якія прызначаныя для таго, каб выглядаць і дзейнічаць як людзі. Асіма можа хадзіць, бегаць, выконваць працы па гаспадарцы, прыносіць вам каву… Вось толькі купіць вы яго не зможаце, бо кампанія Honda яго не прадае.
5. Valkyrie
Назва робата ўзята са скандынаўскае міфалогіі. Як паведамляецца на сайце агенцтва NASA, якое стварыла Валькірыю, гуманоід прызначаны, каб быць надзейным, трывалым, цалкам чалавекападобным робатам, здольным працаваць у інжынерным асяроддзі. Ён можа працаваць ад батарэі гадзіну (што шмат), мае 44 ступені свабоды, можа вярцець галавою, тулавам, і здольны дапамагаць у надзвычайных становішчах. Асобна навукоўцамі распрацоўвалася спецыяльная эластычная «вопратка», якая надае робату як мага больш вольнасці рухаў.
Чытайце таксама: «Разумная калонка выклікала паліцыю падчас сямейнай сваркі»
