На чыгуначнай станцыі ў Мінску токам забіла 20-гадовага студэнта. Яго прыяцель шпіталізаваны
У ноч на суботу ў Мінску два хлопцы спрабавалі пералезці цераз цыстэрну над чыгуначнымі рэйкамі. Адзін з іх, 20-гадовы студэнт, загінуў. Інфармацыю пацвердзіла афіцыйны прадстаўнік МНС па Мінску Вольга Мельчанка.
У МНС распавялі падрабязнасці здарэння.
«24 чэрвеня ў 00.37 выратавальнікам паступіла паведамленне пра паражэнне электрычным токам кантактнай сеткі (напружанне сеткі 27 кВ) двух чалавек, якія, паводле папярэдняй інфармацыі, самавольна спрабавалі пералезці цераз чыгуначную цыстэрну на тэрыторыі 1-га парку чыгуначнай станцыі Мінск-Сартавальны ў Мінску па вуліцы Казінца», — пацвердзіла афіцыйны прадстаўнік ведамства Вольга Мельчанка.
У выніку здарэння загінуў 20-гадовы хлопец, студэнт аднаго са сталічных ВНУ. Яго прыяцель, 24-гадовы праграміст, быў шпіталізаваны з тэрмічным апёкам полымем электрадугі 1-4 ступеняў (80% цела) і апёкавым шокам.
Паколькі аўтамабіль хуткай дапамогі не мог пад'ехаць да месца здарэння, ратавальнікі больш за 500 метраў неслі пацыента на насілках праз лініі цеплатрасы.
