Зборная Беларуcі згуляе сёння ў Мінску незвычайны матч
На здымку абаронца «Велінгтан Фенікс» Томас Дойл
Зборная Беларусі па футболе згуляе сёння на стадыёне «Трактар» (19:00) таварыскі матч. Незвычайнасць яго ў тым, што супернікам будзе зборная Новай Зеландыі — гэта самая аддаленая ад нас дзяржава.
Новазеландцы кіруюцца ў Расію, дзе з 17 чэрвеня возьмуць удзел у Кубку канфедэрацый. Гэта футбольны турнір, што праводзіцца за год да чэмпіянату свету і ў якім бяруць удзел пераможцы кантынентальных першынстваў, чэмпіён свету і краіна-гаспадар спаборніцтваў.
Новая Зеландыя стабільна перамагае на чэмпіянатах Акіяніі (пяць разоў), а ў 2010 г. брала ўдзел у ЧС па футболе ў ПАР, дзе ў групавым турніры згуляла ўсе тры матчы ўнічыю, у тым ліку з Італіяй (1:1), але, праўда, не выйшла з групы.
All Whites (так называюць гэтую зборную) згуляюць на Кубку канфедэрацый у адной групе з Расіяй, Партугаліяй і Мексікай.
У іншай групе гуляюць Камерун, Германія, Чылі, Аўстралія.
У сусветным рэйтынгу Беларусь знаходзіцца на 83-м месцы, Новая Зеландыя — на 95-м.
Нагадаем, што ў пятніцу беларусы ў адборачным матчы да ЧС па футболе перамаглі Балгарыю 2:1.
Што да матча Беларусь — Новая Зеландыя, то цана квіткоў на гульню складае 3-4 рублі.