На Rock Profi — 2017 перамог гурт «Петля пристрастия»
На выходных у клубе ili адбылася пятая цырымонія ўручэння музычных узнагарод Rock Profi паводле галасоў беларускіх музыкаў. У чатырох з шасці намінацый — у тым ліку «Артыст года» — перамог гурт «Петля пристрастия».
Гэта першы выпадак за пяць гадоў існавання прэміі, калі столькі ўзнагарод атрымаў адзін выканаўца. «Петля пристрастия» таксама перамагла ў намінацыях «Найлепшы альбом» ( «Мода и облака»), «Найлепшая песня» ( «Груз») і «Найлепшы запіс» (гукарэжысёр Алег Даманчук за альбом «Мода и облака»). Прызы гурту ўручалі Леслі Найф (Gods Tower), гурт Re1ikt, Раман Жыгараў (Akute) і Валерыя Валадзько (Harotnica).
У дзвюх астатніх намінацыях перамаглі Nebulae Come Sweet («Дэбют года», уручалі арганізатары) і Neuro Dubel («За ўнёсак у беларускую музыку», уручаў Алесь-Францішак Мышкевіч). Без узнагарод засталіся астатнія фаварыты прэміі: Лявон Вольскі (тры намінацыі), Shuma і Mustelide (па дзве).
— Мы вельмі ўдзячныя за тое, што нам у гэтым годзе дасталася такая колькасць узнагарод. Вялікі дзякуй тым, хто галасаваў за нас, і тым, хто ўручаў гэтыя прызы ад Rock Profi. Як бы мы ні круцілі носам, нам гэта сапраўды падабаецца, — кажа лідар гурта Ілля Чарапко-Самахвалаў. — Калі выбіраць самую важную намінацыю, то, мабыць, для нас гэта «Найлепшы альбом», бо гэта суцэльнае палатно, якое мы рыхтавалі тры гады.
Гэтай вясной альбом «Мода и облака» таксама перамог у чатырох намінацыях (у тым ліку «Альбом года») на прэміі Experty.by па галасах беларускіх і замежных крытыкаў. Найбліжэйшы канцэрт «Петли пристрастия» адбудзецца 23 чэрвеня ў культурным цэнтры «Корпус».
У складзе журы Rock Profi — 2017 былі 51 гурт і выканаўца ў стылях рок, індзі, альтэрнатыва, якія выпускалі альбомы ў 2014, 2015 і 2016 гадах. Было разгледжана 37 альбомаў і 60 песень, выпушчаных з 1 студзеня па 31 снежня 2016 года.
Пераможцы-2017:
«Дэбют года» — Nebulae Come Sweet
«Найлепшы запіс» — Алег Даманчук за альбом «Петли пристрастия» «Мода и облака»
«Найлепшая песня» — «Петля пристрастия» «Груз»
«Найлепшы альбом» — «»Петля пристрастия» «Мода и облака»
«Артыст года» — «Петля пристрастия»
«За ўнёсак у беларускую музыку» — Neuro Dubel