Яшчэ больш прапаганды: бюджэт дзяржаўных СМІ ў Расіі вырасце на $45 мільёнаў
Бюджэт расійскага дзяржаўнага інфармацыйнага агенцтва ТАСС павялічыцца на 15,8 млн даляраў, МІА «Россия Сегодня» — на 14 млн даляраў, холдынгу ВГТРК — на 3,2 млн. даляраў. Гэта вынікае з законапраекта аб бюджэце на 2017 год, унесенага ўрадам у пятніцу ў Дзярждуму, піша ВВС.
Галоўны рэдактар і генеральны дырэктар МІА «Россия Сегодня» Маргарыта Сіманьян і Дзмітрый Кісялёў сёлета змогуць распарадзіцца дадатковымі грашыма. Фота ТАСС
Усяго дзяржаўныя выдаткі на СМІ прапанавана павялічыць на 2,5 млрд расійскіх рублёў (каля $45 млн). Гэтыя сродкі накіраваныя Федэральнаму агенцтву па справах друку, агульны бюджэт якога ў 2017 годзе пакуль што складае 74,3 млрд рублёў (каля $1,3 млрд). Грошы праходзяць па артыкуле «Сродкі масавай інфармацыі», гэта значыць ідуць на субсідыі дзяржаўным СМІ.
Папраўкі ў бюджэт, якія тычацца СМІ, павінны быць разгледжаныя ў профільным камітэце Дзярждумы — камітэце па інфармацыйнай палітыцы. Суразмоўца ВВС у камітэце сказаў, што папраўкі будуць падтрыманы.
