28 мая — Re1ikt прэзентуе на біс альбом «Kufar»
ТNT Rock Club (Рэвалюцыйная, 9). Пачатак а 19.00.
«Перад тым як грунтоўна засесці за новы матэрыял, працягваем традыцію граць праграму на біс — не так шмат нагод існуе каб выканаць цалкам альбом. Многія з трэкаў даволі складана выканаць жыўцом, таму для нас гэта добры выклік. А для нашых слухачоў добрая магчымасць паслухаць песні, якія мы вельмі рэдка граем на канцэртах», - кажа лідар гурта Re1ikt бубнач Аляксандр Дземідзенка.
Прэзентацыя дыска з аншлагам прайшла ў сталічным клубе «Бруге» ўзімку. Па выніках мінулага года «Kufar» трапіў у топ-10 сябраў вялікага журы парталу Experty.by - Сяргея Філімонава, Максіма Жбанкова, Дзіны Кудрэйкі, Сяргея Будкіна, Змітра Падбярэзскага. Таксама адным з сваіх улюбёных альбомаў яго назваў амерыканскі тэлевядучы Мэт О’Донэл.
Альбом «Kufar» запісваўся ў Польшчы паралельна з найлепшым беларускім рок-альбомам 2015 года «Лекавыя травы» (Experty.by і Rock Profi) і атрымаўся такім жа лірычным і атмасферным. У яго ўвайшлi і шматлікія бонус-трэкі «незвычайнага» Re1ikt, які заўсёды эксперыментуе (напрыклад, стадыённы хіт «Razam» — гімн футбольнага клуба «Крумкачы», а таксама джаз-рокавы дуэт «Tolki shieh» з саксафаністам Krambabambula Паўлам Аракелянам на словы Янкі Купалы).
Сродкі на выданне альбому, а таксама на здымкі кліпа на песню «Drobnieńki doždžyk» гурт сабраў па выніку паспяховай краўдфандынгавай кампаніі на платформе «Талака».
Апроч Мінску Re1ikt прэзентаваў альбом «Kufar» і ў шэрагу беларускіх гарадоў. Цяпер музыкі «на біс» зноў прадэманструюць кружэлку ў сталіцы, а таксама парадуюць слухачоў сваімі найлепшымі кампазіцыямі і сюрпрызамі, якія пакуль трымаюць у таямніцы.
Re1ikt — гурт, які працуе ў напрамках progressive rock, post-rock і alternative rock. Каманда спалучае іх з традыцыйным беларускім песенным фальклорам, які творча пераасэнсоўвае і робіць актуальным для сучаснага слухача. Калектыў атрымліваў музычныя узнагароды ў Польшчы і Беларусі, выступаў ва Украіне, у Літве, Расіі.
Канцэрт адбудзецца 28 мая ў мінскім TNT Rock Club (Рэвалюцыйная, 9). Пачатак а 19.00.
