Каб удзельнікі флэшмоба дакладна «намалявалі» сэрца ў вокнах інтэрната, адміністрацыя вырубіла электрычнасць астатнім жыльцам
Студэнтка БДУ, якая жыве ў інтэрнаце №10, распавяла, як прайшла акцыя, мэтай якой было запаліць вокны інтэрната ў форме сэрца.
Да чаго быў прымеркаваны «флэшмоб», студэнтка нават не ведала.
Па яе словах, некалькі дзён у холе інтэрната вісела аб'ява з просьбай выключыць святло 22 мая з 21:00 да 21:30. Была намаляваная нават схема вокнаў — дзе павінен быць уключанае святло, а дзе — не.
Не чакаючы ініцыятывы ад жыльцоў інтэрната, адміністрацыі вырашыла забяспечыць гарантаваны поспех.
«Па гукаўзмацняльніку прагучала тэрміновае паведамленне, што на гэты час усім выключаць электрычнасць і «дзякуй за разуменне». Без васьмі дзевяць, а электрычнасці ўжо няма, пліта не працуе, тэлефон не зараджаецца, халадзільнік не марозіць, а галава, падобна, у кагосьці не варыць… Эх, нават чайку не пап'еш!», — адзначае студэнтка.
Самае смешнае, што ў 21.00 «сэрца» ўбачыць усё адно было немагчыма, бо ў гэты час на вуліцы было яшчэ светла.
«Флэшмоб» праводзіўся ў рамках дабрачыннай акцыі «Забег тысячы сэрцаў», якую ладзіць мабільны аператар «Вэлком». Кампанія ахвяруе грошы ў аддзяленне кардыялогіі РНПЦ дзіцячай хірургіі.
