Фігурант «справы патрыётаў» Палтаржыцкі пераведзены з турмы КДБ пад хатні арышт
У спісе затрыманых у «справе патрыётаў» за кратамі застаецца 16 чалавек.
Яўген Палтаржыцкі, якога затрымалі 21 сакавіка і трымалі ў СІЗА КДБ у справе «Белага легіёна», пераведзены на хатні арышт.
Як паведамляе spring96.org, меру стрымання для Яўгена Палтаржыцкага змянілі 19 мая.
Спачатку Яўген абвінавачваўся ва ўдзеле ў падрыхтоўцы масавых беспарадкаў, пазней да гэтага дадалося стварэнне незаконнага ўзброенага фармавання.
Яўген Палтаржыцкі — гісторык паводле адукацыі. У канцы сакавіка па Беларускім тэлебачанні былі паказаныя кадры аператыўнай здымкі, на якіх ён даваў каментары пра схованку арматуры, нібыта знойдзенай у лесе следчымі ў справе «Белага легіёна».
У спісе затрыманых у «справе патрыётаў», паводле «Вясны», за кратамі застаецца 16 чалавек. Іншыя 16 чалавек, якіх раней затрымлівалі за ўдзел у падрыхтоўцы масавых беспарадкаў і арганізацыю незаконнага вайсковага фармавання, вызваленыя з-пад варты пад падпіску аб нявыездзе ці без абмежаванняў.
