Унучка імператара Японіі выйдзе замуж і страціць тытул прынцэсы
У імператарскім доме Японіі паведамілі пра маючыя адбыцца заручыны прынцэсы Мака Акісіна — першай унучкі кіруючага імператара Акіхіта і старэйшай дачкі яго сына Акісіна, піша ВВС.
Мака Акісіна — першая ўнучка кіруючага імператара Японіі. Фота Reuters
Выбраннікам 25-гадовай прынцэсы стаў яе аднагодак Кей Камура, супрацоўнік юрыдычнай фірмы. Яны пазнаёміліся пяць гадоў таму, будучы студэнтамі Міжнароднага хрысціянскага універсітэта ў Токіо.
Паколькі будучы жаніх прынцэсы — не шляхетнага паходжання, з падачай заявы аб уступленні ў шлюб прынцэса Мака пазбаўляецца тытула і пакідае імператарскую сям'ю. Ёй будуць прадастаўленыя звычайныя грамадзянскія правы, уключаючы права голасу, а таксама выплачаная аднаразовая дапамога ад дзяржавы.
Вестка пра хуткія заручыны прынцэсы спарадзіла ў японскім грамадстве дыскусіі па пытанні аб неабходнасці выхаду прынцэс са складу імператарскай сям'і ў выпадку шлюбу з простымі людзьмі.
Акрамя прынцэсы Мака ў складзе імператарскай сям'і ёсць яшчэ шэсць незамужніх прынцэс. Адзіны прадстаўнік мужчынскага полу ў малодшым пакаленні імператарскай сям'і — прынц Хісахіта, малодшы брат прынцэсы Мака.
У Японіі гучаць асцярогі, што імператарская сям'я не зможа выконваць свае грамадскія абавязкі, калі прынцэсы так і будуць выходзіць замуж за простых людзей і губляць з-за гэтага свой тытул.
Экспертная група японскага ўрада заявіла аб неабходнасці прыняцця тэрміновых мер, якія дапамогуць захаваць імператарскую сям'ю дастаткова вялікай.
У прыватнасці, абмяркоўваецца магчымасць дазволіць прынцэсам ствараць уласныя галіны імператарскай сям'і пасля ўступлення ў шлюб.
Прынцэса Мака (злева) з бацькамі — прынцэсай і прынцам Акісіна. Фота ЕРА
Да афіцыйнага вяселля прынцэсы Мака і Кея Камура павінна адбыцца некалькі важных рытуалаў і працэдур.
Абрад заручын па традыцыі прадугледжвае візіт у імператарскі палац прадстаўніка жаніха з падарункамі. Пасля ён жа афіцыйна аб'яўляе дату шлюбу.
Па меры набліжэння дня вяселля праводзіцца яшчэ некалькі абрадаў, у адным з якіх будучая нявеста выказвае сваю ўдзячнасць імператару і імператрыцы.
У дзень вяселля прадстаўнік жаніха забірае нявесту з палаца, і толькі затым праводзіцца абрад шлюбу.
У адпаведнасці з законам Японскага імператарскага дома, калі жанчына з імператарскай сям'і выходзіць замуж не за арыстакрата, яна становіцца простай жанчынай, і ёй выплачваецца аднаразовая дапамога ад дзяржавы. Суму выплаты ўстанаўлівае дзяржсавет з удзелам прэм'ер-міністра.
Калі ў 2005 годзе Саяка Курода, адзіная дачка імператара Акіхіта і імператрыцы Міціка, выйшла замуж за гарадскога дызайнера, яна атрымала каля 150 млн іен (1,3 млн даляраў).
Іншая былая прынцэса Нарыка Сенге, стрыечная пляменніца імператара, пасля вяселля з сынам першасвятара сінтаісцкага храма ў 2014 годзе атрымала 100 млн іен (870 тысяч даляраў).
