Дэпутат Дзевятоўскі расказаў, што чакае хакейную зборную пасля крытыкі Лукашэнкам
Шмат нараканняў выклікала гульня зборнай Беларусі па хакеі на чэмпіянаце свету 2017: нашая каманда скончыла выступленне ў двух кроках ад вылету з эліты, прапусціўшы 27 шайбаў у 7 матчах.
Такія вынікі раз'юшылі нават кіраўніка дзяржавы. «Гэта стыдобішча», — так выказаўся Лукашэнка пра гульню зборнай.
Журналіст «Нашай Нівы» падчас пасяджэння Палаты Прадстаўнікоў распытаў дэпутата і былога спартоўца Вадзіма Дзевятоўскага пра тое, што чакае зборную пасля крытыкі Лукашэнкам.
Фота zviazda.by
«Прасцей за ўсё пахаваць спартоўца, навесіць цэтлікі, што ён недзеяздольны, нікчэмны… Але гэта не так, — сказаў Дзевятоўскі. — Я заўсёды буду паважаць працу спартоўца. Для мяне гэта святое — я сам столькі аддаў… Калі вы задаяце такое пытанне, то што вы прапануеце? Выгнаць усіх? Не, канечне. Патэнцыял у нас ёсць — у цяжэйшай сітуацыі падчас гульні з французамі мы паказалі, што нават у меншасці можам навязваць ім сваю гульню. Як у шараговага гледача, у мяне ёсць нейкая супярэчнасць, канечне — нібыта дзве розныя каманды ў адной гульні: то млява, то рвуць гэтых французаў. Канечне, некаторыя высновы будуць зроблены — гэтым павінны займацца спецыялісты. Калі спецыялісты скажуць, што недзе быў правал, то нешта трэба рабіць».
Пра прычыны правалу дэпутат выказаўся так:
«У нашай зборнай ідзе змена пакаленняў, трэба пачакаць. Зноў жа — гэта сітуацыя з вобшукам каманды… Ветэраны, пры ўсёй павазе, ужо не могуць гуляць, як у найлепшыя гады. А моладзь яшчэ не можа адаптавацца да такога высокага ўзроўню. Ці трэба нам натуралізаваныя канадцы? А пра прычыны цяжка казаць. Дзе быў умоўны збой? У якім годзе? Каб вырасціць элітнага хакеіста, напрыклад, як вырошчала наваполацкая школа… Кітараў, Касціцын, Дзянісаў. Дзе гэты збой адбыўся? Я заўсёды кажу: трэба гадаваць сваіх, але ў сітуацыі, калі на нейкім этапе няма кім замяніць легіянера, то што ж? Застаецца натуралізацыя», — падсумаваў Дзевятоўскі.
