Чаму «Веснік БДУ» перайменавалі ў «Журнал Белорусского государственного университета»?
Навуковы часопіс «Веснік БДУ» з 2017 года перайменаваны ў «Журнал Белорусского государственного университета». Чаму беларускамоўную назву замянілі на рускамоўную?
Ва ўніверсітэце нам патлумачылі, што гэта зроблена ў межах рэфармавання выдання.
Раней выходзіла 4 серыі «Весніка», кожная тры разы на год:
- Вестник БГУ. Серия 1, Физика. Математика. Информатика.
- Вестник БГУ. Серия 2, Химия. Биология. География
- Веснік БДУ. Серыя 3, Гісторыя. Эканоміка. Права.
- Веснік БДУ. Серыя 4, Філалогія. Журналістыка. Педагогіка.
«Але цяпер у сувязі з тым, што мы імкнемся адпавядаць міжнародным стандартам, хочам выйсці на сусветны ўзровень, уключыцца ў міжнародныя базы дадзеных… То трэба было структурыравацца. У прыватнасці, прыбраць з назвы слова «Веснік», размеркаваць серыі. То бок, цяпер не будзе такога, што тры накірункі ў адным часопісе, цяпер кожны накірунак мае свой часопіс. Напрыклад, былі «журналістыка, філалогія, педагогіка», то цяпер філалогія асобна», — патлумачылі «Нашай Ніве» у рэдакцыі экс-«Весніка».
«Што да беларускай мовы, то розныя выданні будуць выходзіць на розных мовах. Некаторыя — па-беларуску, некаторыя па-руску і англійску», — рэзюмавалі ў рэдакцыі.
