Абвешчаныя канчатковыя вынікі канстытуцыйнага рэферэндуму ў Турцыі
Абвешчаныя канчатковыя вынікі канстытуцыйнага рэферэндуму ў Турцыі, праведзенага 16 красавіка.
Рашэнне Вышэйшай выбарчай камісіі Турцыі (YSK) аб выніках агульнанацыянальнага галасавання апублікавана ў афіцыйным весніку ўрада — Resmi Gazete.
У рашэнні адзначаецца, што правам голасу на рэферэндуме ў Турцыі скарысталіся 48 млн 374 тыс. 576 з 55 млн 319 тыс. 222 зарэгістраваных выбаршчыкаў. Яўка ўнутры краіны склала 87,45 працэнта. Пры гэтым 845 тыс. 627 бюлетэняў былі прызнаны несапраўднымі.
З 2 млн 972 тыс. 676 выбаршчыкаў, зарэгістраваных за мяжой, прагаласавалі 1 млн 325 тыс. 682. Яўка за мяжой склала 44,6 працэнта, 15 тыс. 861 бюлетэнь прызнаны несапраўдным.
Па выніках галасавання 25 млн 157 тыс. 463 выбаршчыкі (51,41 працэнта) выказаліся за ўнясенне паправак у канстытуцыю краіны, 23 млн 779 тыс. 141 грамадзянін (48,59 працэнта) прагаласавалі супраць.
Папраўкі прадугледжваюць пераход з парламенцкай на прэзідэнцкую форму праўлення. Колькасць дэпутатаў парламента будзе павялічана з 550 да 600, узроставы цэнз для выбрання ў парламент будзе зніжаны з 25 да 18 гадоў. Выбары ў Вялікі нацыянальны сход (парламент) Турцыі і прэзідэнцкія выбары будуць праводзіцца раз у пяць гадоў і ў адзін і той жа дзень.
Выбраны прэзідэнт можа захаваць членства ў палітычнай партыі. Кандыдатаў на пасаду прэзідэнта могуць вылучаць фракцыі палітычных партый, якія паасобку або ў рамках кааліцыі пераадолелі на апошніх парламенцкіх выбарах 5-працэнтны выбарчы бар'ер, або асобы, якія змогуць заручыцца падтрымкай 100 тыс. выбаршчыкаў.
Пасаду прэм'ер-міністра плануецца скасаваць. Віцэ-прэзідэнты і міністры будуць назначацца і здымацца з пасады прэзідэнтам. Стварэнне і скасаванне міністэрстваў, іх абавязкі, паўнамоцтвы, структуры, цэнтральныя і перыферыйныя структуры будуць фарміравацца рашэннямі кіраўніка дзяржавы. Рашэнне аб правядзенні паўторных выбараў прымаецца трыма пятымі ад агульнай колькасці галасоў парламентарыяў.
