У польскім горадзе Свебадзіцэ абрынуўся дом — ёсць ахвяры
Абвал двухпавярховага жылога дома адбыўся ў горадзе Сьвебадзіцэ на паўднёвым захадзе Польшчы. Дагэтуль вядома аб трох загінулых.
Як мяркуецца, прычынай абвалу быў выбух бытавога газу. Абвалілася каля 80% будынка даваеннай пабудовы.
З-пад завалаў дасталі сем чалавек, трое зь іх загінулі, чацьвёра пацярпелых адпраўленыя ў шпіталі. Як паведамляе польская тэлевізія, двое загінулых — малыя дзеці, а трэці — мужчына сярэдняга веку.
Пасьля абвалу тры чалавекі здолелі самастойна выбрацца з-пад завалаў. Працягваецца пошук тых, хто застаецца пад заваламі — як мяркуецца, гэта чатыры чалавекі. Як паведаміў на брыфінгу кіраўнік Ніжнесілезскага ваяводзтва Павал Грэняк, разбор завалаў можа працягнуцца яшчэ каля сутак.
На месцы здарэньня працуюць каля 140 ратавальнікаў, улучна з спэцыялізаванымі пошукавымі групамі з абсталяваньнем і навучанымі для пошуку людзей сабакамі. Для аказаньня дапамогі пацярпелым накіравана некалькі брыгад хуткай дапамогі і пяць выратавальных верталётаў.
