Чыноўнікі палічылі рэкламу хрэну ABC непрыстойнай, але караць нікога не будуць
Летась кампанія ABC выпусціла скандальны каляндар з рэкламай хрэну. Такі піяр шмат у каго выклікаў абурэнне. Людзі нават стварылі петыцыю з патрабаваннем прыцягнуць да адказнасці кіраўніка кампаніі за распаўсюджванне рэкламы эратычнага зместу.
Той самы каляндар.
Зварот, накіраваны ў Міністэрства антыманапольнага рэгулявання і гандлю падпісалі 10 чалавек. На днях яны атрымалі наступны адказ: «Спалучэнне візуальнай і тэкставай інфармацыі ў прадстаўленым сюжэце стварае двухсэнсоўнасць, накіроўваючы ўспрыманне спажыўцоў рэкламы на непрыстойны падтэкст, у сувязі з чым рэклама парушае прыведзеную норму Закона і, такім чынам, з'яўляецца неналежнай. Аднак у заяве не змяшчаецца інфармацыя аб тым, калі і дзе яна распаўсюджвалася. Для прыцягнення да адказнасці яе недастаткова. Калі гэтыя сюжэты выкарыстоўваліся ў якасці ілюстрацый да журналісцкіх матэрыялаў на тэму рэкламы, то яны рэкламай не з'яўляюцца і, такім чынам, не падпадаюць пад дзеянне Закона».
Адказ, падпісаны намесніцай міністра гандлю і антыманапольнага рэгулявання Ірынай Наркевіч, можа быць абскарджаны ў судзе. Пакуль жа стваральнікі петыцыі абмяжуюцца тым, што не будуць купляць хрэн ABC, палічыўшы за лепшае гатаваць яго ў хатніх умовах.
