Прэзідэнт Грузіі вырасціў на сваім агародзе падораную Лукашэнкам бульбу
Прэзідэнт Грузіі Георгій Маргвелашвілі вырасціў на сваім агародзе падораную Аляксандрам Лукашэнкам бульбу. Пра гэта ён распавёў у інтэрв'ю праграме «Буйным планам» на тэлеканале «Беларусь 1», паведамляе БЕЛТА.
Скрыншот з YouTube
Вядучы праграмы Марат Маркаў адзначыў, што прэзідэнт Грузіі жыве за горадам. У сувязі з гэтым ён пацікавіўся, ці вырошчвае грузінскі лідар нешта на прысядзібным участку.
«Аляксандр Рыгоравіч мне падарыў беларускую бульбу, якую я пасадзіў. Я яе вырасціў», — распавёў Маргвелашвілі.
Разам з тым ён прызнаўся, што ў параўнанні з тым ураджаем, які атрыманы на ўчастку кіраўніка беларускай дзяржавы, яго ўраджай больш сціплы. «У яго такія вялікія мяшкі і бульба вялікая выйшла. У мяне так добра не выйшла. Але, так, я займаюся сельскай гаспадаркай», — адзначыў ён.
