У Магілёве пакажуць невядомыя фота часоў Другой сусветнай
У Музеі гісторыі Магілёва 25 студзеня адкрыецца выстава «Невядомы Магілёў», якая стала вынікам некалькіх гадоў руплівай працы па зборы і музеефікацыі выяваў горада Магілёва на фотаздымках, зробленых падчас Другой сусветнай вайны.
Вялікую частку прадстаўленых фота знайшоў і набыў за свой кошт энтузіяст гісторыі горада Алег Давід Лісоўскі, які сабраў больш за 2000 здымкаў старога Магілёва. Больш за 200 з гэтых фота будуць прадстаўленыя на выставе, распавёў калекцыянер.
Жаўнеры вермахта часта бралі фотатэхніку з сабой на вайну і зрабілі шмат каштоўных кадраў, на якіх аказалася адлюстраванай гісторыя Магілёва ў гады нямецкай акупацыі.
«Асаблівую цікавасць выклікае серыя фотаздымкаў, зробленых 10 красавіка 1942 года падчас т.зв. «магілёўскага цунамі» — трагедыі на Дубравенцы, што забрала сотні чалавечых жыццяў.
Сярод фотаздымкаў маюцца таксама невядомыя раней выявы масавага публічнага смяротнага пакарання на Савецкай плошчы ў красавіку 1942 года. Увагу выклікаюць таксама здымкі, зробленыя салдатамі вермахта на Буйніцкім полі падчас баёў у ліпені 1941 года», - паведамляе старонка музея ў Facebook.
Таксама фота паказваюць гістарычную архітэктурна-планіровачную структуру горада — ужо пацярпелыя ад вайны, але ўсё яшчэ велічныя магілёўскія храмы, грамадскія установы і жылыя дамы, якія неўзабаве будуць назаўсёды страчаныя.
Адкрыццё выставы адбудзецца 25 студзеня ў 17.00 у Выставачнай зале Музея гісторыі Магілёва. Закрыецца выстава 26 лютага.
