Пайшоў з жыцця легендарны настаўнік і аўтар падручнікаў па беларускай мове Уладзімір Дзіско
«Сёння пайшоў з жыцця Уладзімір Дзіско — настаўнік паводле паклікання. Выкладчык беларускай мовы. Яго педагагічная дзейнасць няспынна доўжылася больш за паўстагоддзя з 1961 па 2016 і ў ёй незвычайным чынам сышліся і праца ў міністэрстве асветы, і ў педагагічным каледжы, і ў коласаўскім ліцэі. Страта тым больш вялікая, таму што менавіта такіх адданых справе ВЫКЛАДЧЫКАЎ сёння не хапае. Сто разоў будуць перапісвацца падручнікі, мяняцца школьныя праграмы, але асоба сумленнага і адказнага НАСТАЎНІКА застанецца. Менавіта такой АСОБАЙ ёсць і будзе Уладзімір Антонавіч Дзіско ў памяці сваіх навучэнцаў», — напісаў у фэйсбуку Ягор Сурскі.
Уладзімір Антонавіч Дзіско нарадзіўся 6 верасня 1936 года ў вёсцы Брольнікі Наваградскага раёна Гарадзенскай вобласці. У 1956 - 1961 гадах вучыўся ў Мінскім дзяржаўным педагагічным інстытуце імя А.М. Горкага. Паводле размеркавання паехаў выкладаць беларускую мову і літаратуру ў Аршанскую індустрыяльна-педагагічную вучэльню (сёння гэта педагагічны каледж). Доўгія гады выкладаў у Коласаўскім ліцэі.
