Ананіч: Regnum тэндэнцыйна асвятляў дзейнасць кіраўніка Беларусі
Міністр інфармацыі Лілія Ананіч пракаментавала затрыманні аўтараў расійскіх сайтаў за антыбеларускія артыкулы. Нагадаем, за апошнія дні былі затрыманыя Юрый Паўлавец, Дзмітрый Алімкін і Сяргей Шыптэнка. Яны супрацоўнічалі з сайтамі REGNUM, Lenta.ru, Eurasia Daily. Следчы камітэт пачаў на іх справы за распальванне міжнацыянальнай варажнечы.
У каментары БелТА Ананіч нагадала, што яе ведамства праводзіць сістэмны маніторынг інфармацыйнай прасторы. З 2015 года, калі набылі моц змены ў закон аб СМІ, Мінінфарм абмяжоўваў доступ да 88 інфармацыйных рэсурсаў. У 2016 годзе вынесена таксама сем папярэджанняў розным сайтам.
«Аналіз інфармацыйнай прасторы выявіў, што ў апошні час пачасціліся факты з'яўлення ў шэрагу СМІ і інтэрнэт-рэсурсаў матэрыялаў тэндэнцыйнага, а часам і адкрыта дэструктыўнага характару ў дачыненні да Беларусі, дзяржаўнай улады нашай краіны, беларускага народа», — канстатавала чыноўніца. У публікацыях на сайтах REGNUM, LENTA.RU, Eurasia Daily ставіліся пад сумнеў суверэнітэт Беларусі, былі абразы на адрас беларускага народа, яго гісторыі, мовы, культуры.
«Найбольшую актыўнасць у публікацыі такога роду матэрыялаў праяўляе інфармагенцтва REGNUM, падаючы ў тэндэнцыйным ключы дзейнасць кіраўніка беларускай дзяржавы, ўладных структур у розных галінах — палітыцы, эканоміцы, культуры. Пры гэтым увесь час мусіруюцца тэзісы пра нібыта «сыход Беларусі на Захад», «антырасійскую палітыку беларускай улады» і гэтак далей», — патлумачыла Ананіч.
Найбольшае абурэнне, па яе словах, выклікаў артыкул Дзмітрыя Алімкіна (пад псеўданімам «Ала Бронь») «Беларусь сыходзіць з Рускага свету цішком, з улікам ўкраінскага досведу. Беларуская мова: не кіем, дык палкай». Менавіта там Беларусь называлася «звар'яцелай недадзяржавай» і гаварылася, што беларускую мову прыдумалі «для паступовага пераводу рускіх у палякаў».
Мінінфармацыі накіравала матэрыялы ў Рэспубліканскую экспертную камісію, якая пацвердзіла наяўнасць праяваў экстрэмізму ў гэтых матэрыялах у частцы распальвання нацыянальнай і сацыяльнай варажнечы. Таму матэрыялы былі перададзеныя ў Следчы камітэт, які і пачаў крымінальныя справы.
Дарэчы, Мінінфарм папярэдзіў расійскі бок, кажа Ананіч. 1 лістапада былі дасланыя адпаведныя паведамленні па фактах публікацыяў у Міністэрства сувязі і масавых камунікацый Расіі, Федэральную службу па наглядзе ў сферы сувязі, інфармацыйных тэхналогій і масавых камунікацый.
Таксама зварот быў накіраваны спецыяльнаму прадстаўніку прэзідэнта Расіі па міжнародным культурным супрацоўніцтве Міхаілу Швыдкому. Ён ужо адказаў, што абразлівыя для Беларусі выказванні належаць «часцяком маргіналізаваным аўтарам, ні ў якай меры не адлюстроўваюць ні пазіцыю кіраўніцтва Расіі, якая нязменна імкнецца да паглыблення расійска-беларускага ўзаемадзеяння ва ўсіх галінах супрацоўніцтва, ні традыцыйна сяброўскае стаўленне да Беларусі і яе народу з боку расіянаў».
Па словах Ананіч, «замоўцы і аўтары такіх артыкулаў спрабуюць пасеяць варожасць паміж нашымі краінамі і народамі. Безумоўна, гэта не пазіцыя расійскага кіраўніцтва, а тых дэструктыўных сіл і колаў, якія спрабуюць убіць клін у нашы глыбокія сяброўскія адносіны, у працэс будаўніцтва Саюзнай дзяржавы».
