Затрыманы дырэктар мінскага заапарку
Следчым камітэтам распачата крымінальная справа ў дачыненні да дырэктара дзяржаўнай культурна-асветніцкай установы «Мінскі заапарк», паведаміла ў сваім фэйсбуку афіцыйны прадстаўнік СК Юлія Ганчарова.
У ходзе праверкі, праведзенай супрацоўнікамі УБЭП ГУУС Мінгарвыканкама, устаноўлена, што службовая асоба, выкарыстоўваючы свае арганізацыйна-распарадчыя паўнамоцтвы ў карыслівых мэтах, у парушэнне палажэнняў заключанай дамовы, арганізавала вываз шчанятаў гіенападобных сабак з тэрыторыі Мінскага заапарку ў Брэсцкую вобласць для наступнага продажу.
На пачатку жніўня ў хляве жыхара вёскі Стрыгава Кобрынскага раёна знойдзена 7 гіенападобных сабак.
Дырэктар затрыманы, з ім працуюць следчыя. Прычыненая шкода ацэньваецца на суму больш за 20 тысяч рублёў.
Дзеянні службовай асобы кваліфікаваны па ч. 3 арт. 210 (крадзеж шляхам злоўжывання службовымі паўнамоцтвамі) Крымінальнага кодэкса Рэспублікі Беларусь.
