Кіраўнік Руху «За свабоду» ўпаў з яблыні з электрапілой
Абрэзка бацькавага саду кепска скончылася для старшыні Руху «За Свабоду» Юрася Губарэвіча. У старых драбінах праламіліся цапкі, і палітык з двухметровай вышыні, з электрапілой у руках, упаў на свайго брата.
Толькі цудам ён і брат абышліся без пераломаў і парэзаў.
Губарэвіч дапамагае 70-гадовай маме глядзець сад на сваёй радзіме пад Белаазерскам. Дрэвы садзіў яшчэ яго бацька ў 1980-х.
«З гэтай яблыні сабралі некалькі скрынь яблык, мама раздае іх нам і сваякам, — расказаў «Нашай Ніве» Губарэвіч. — Мы з братам прыязджаем на лецішча некалькі разоў на год дапамагчы маці з сур'ёзнымі работамі», — кажа ён.
Юрась Губарэвіч за плугам (справа).
З траўмамі, атрыманымі ў працэсе садовых работ, да медыкаў штогод звяртаюцца некалькі соцень беларусаў.
Садовыя дрэвы абразаюць або позна-позна восенню, або рана-раненька ўвесну, калі сок яшчэ не ходзіць.
