У Германіі прэзентавалі першы ў свеце цягнік на вадароднай цязе
Французская транспартная кампанія Alstom прэзентавала першы ў свеце пасажырскі цягнік, які будзе ездзіць толькі на вадародзе, паведамляе ScienceAlert.
Alstom
Замест выкідаў, звыклых для звычайных цягнікоў на дызельнай цязе, цягнік Coradia iLint будзе выкідваць у атмасферу толькі пару і вадзяныя кроплі. Цягнік упершыню быў паказаны публіцы на выставе InnoTrans, якая прайшла ў Берліне.
Электраматоры цягніка сілкуюцца ад літый-іённых акумулятараў, якія зараджаюцца ад вадародных паліўных элементаў. Адной запраўкі вадародам хапае на 800 км шляху.
Паводле дадзеных газеты Die Welt, цягнік будзе курсіраваць па маршрутах у Ніжняй Саксоніі, мясцовыя ўлады ўжо замовілі французам 14 саставаў. Калі выпрабаванні будуць паспяховымі, досвед будзе перанесены на іншыя раёны Германіі.
