Амерыканская гімнастка, якая прадстаўляла Беларусь на Алімпіядзе, прыехала ў Рыа з траўмай
Натуралізаваная амерыканская спартыўная гімнастка Кайлі Дыксан, якая прадстаўляла Беларусь на Алімпіядзе-2016, прыехала на Гульні з траўмай. Пра гэта 30 жніўня ў Мінску на прэс-канферэнцыі, прысвечанай падвядзенню вынікаў Алімпіяды ў Рыа-дэ-Жанейра, паведаміў першы намеснік міністра спорту і турызму, шэф місіі беларускай дэлегацыі Аляксандр Гагіеў.
Reuters
«Аб траўме гімнасткі ўсе даведаліся толькі на Алімпіядзе. Яна прылятала туды з ЗША, дзе і рыхтавалася. У Беларусі яна не была. Калі Дыксан прыляцела, нашы медыкі яе агледзелі, з'явіліся падазрэнні. Зрабілі абследаванне, якое выявіла трэшчыну ў стапе. Усё, што можна было падлячыць, падлячылі», — сказаў намеснік міністра.
У кваліфікацыі мнагабор'я Дыксан паказала перадапошні, 58-мы вынік.
На пытанне, ці дапушчальныя такія сітуацыі, калі спартсмен прыязджае з траўмай прадстаўляць краіну і пры гэтым нават ні разу не паказваецца ў ёй, Гагіеў адказаў: «Мы зрабілі высновы. Думаю, тут мы пайшлі на повадзе ў людзей, якія ўсё гэта прапаноўвалі, улічваючы безвыходнасць у нашай спартыўнай гімнастыцы. Цяпер бачым, што тут у нейкай ступені памыліліся. Калі чалавек хоча выступаць за нашу краіну, ён павінен знаходзіцца ў ёй, хаця б заключныя этапы падрыхтоўкі, каб мы разумелі, каго мы вязем».
Гаворачы ў цэлым аб натуралізацыі замежных спартсменаў, чыноўнік адзначыў, што з'яўляецца прыхільнікам, «каб максімальна выступалі беларусы», але ў той жа час ён не бачыць нічога дрэннага ў прыцягненні замежнікаў.
На прэс-канферэнцыі была паднятая яшчэ адна скандальная тэма — дыскваліфікацыя з-за допінгу таэквандыста Армана-Маршала Сілы, які з'яўляўся адным з галоўных прэтэндэнтаў на перамогу ў Рыа ў сваёй вагавой катэгорыі.
«Дэталяў пакуль няма, ідзе расследаванне. Гэта быў удар нам у спіну. Нікога пакуль не хачу вінаваціць. Сёння ў адпаведнасці з антыдопінгавымі правіламі персанальную адказнасць спартсмен нясе за ўсё, што трапляе ў яго арганізм. Нават калі гэта было па халатнасці, ніхто абвінавачанняў не здымае. Канцэнтрацыя мельдонію — 3.100. Гэта вельмі высокая канцэнтрацыя», — сказаў Гагіеў.
Паводле яго слоў, трэнер спартсмена і сам атлет запэўніваюць, што не выкарыстоўвалі прэпарат. «Я схільны ім верыць, паколькі гэта не той від спорту, у якім мельдоній моцна дапамагаў бы нават у плане аднаўлення», — заявіў намеснік міністра.
