У Расіі затрыманы епіскап рэфарматарскай праваслаўнай царквы
Кіраўніка некананічнай рэфарматарскай праваслаўнай царквы Сяргея Жураўлёва ў Санкт-Пецярбургу абвінавацілі ў незаконнай місіянерскай дзейнасці.
Як паведамляе Фантанка.ру, мужчыну затрымалі 27 жніўня ў габрэйскай месіянскай супольнасці, дзе ён чытаў пропаведзь.
«Мяне забралі ў 5 аддзяленне паліцыі Фрунзенскага раёна Санкт-Пецярбурга і пратрымалі некалькі гадзін. Допыт, несправядлівыя абвінавачванні, пратакол», — распавёў ён.
Па інфармацыі выдання, у Пецярбургу гэта першы выпадак, калі кагосьці прыцягвалі згодна з новымі палажэннямі КоАП. Пакаранне прадугледжана папраўкамі, якія дадалі ў КоАП РФ пасля прыняцця «пакета Яравой».
Як вядома, прэзідэнт Расіі Уладзімір Пуцін падпісаў так званы «пакет Яравой» 7 ліпеня. У ліку іншага ён утрымліваў папраўкі ў КоАП. Згодна з імі, цяпер можна караць за місіянерства за межамі адведзеных законам «Аб свабодзе сумлення» месцаў.
Паводле інфармацыі Meduza, у жніўні па гэтым артыкуле склалі пратакол на крышнаіта, які раздаваў літаратуру, але суд адмовіўся яго караць.
Сяргей Жураўлёў — былы святар Рускай праваслаўнай царквы.
Некананічная рэфарматарская праваслаўная царква мае прыходы на тэрыторыі Украіны, Расіі і Беларусі.
