Пуцін: Расія ніколі не спрабавала ўмешвацца ў Brexit
Выхад Брытаніі з Еўрасаюза будзе мець наступствы і для свету, і для Расіі, заявіў Уладзімір Пуцін.
Ён падкрэсліў, што Расія не будзе ўмешвацца ў працэсы, звязаныя з «брэксітам», і ніколі не спрабавала гэтага рабіць.
Расійскі прэзідэнт, выступаючы ў Ташкенце па заканчэнні саміту ШАС, раскрытыкаваў словы прэм'ер-міністра Вялікабрытаніі Дэвіда Кэмерана, які заявіў, што «брэксіт» — на руку Расіі.
Пуцін назваў гэтыя словы брытанскага прэм'ера «праявай нізкага ўзроўню палітычнай культуры».
«Не думаю, што «брэксіт» паўплывае на санкцыйную палітыку ЕС у дачыненні да Расіі», — цытуе Пуціна Інтэрфакс.
Расія будзе імкнуцца да мінімізацыі негатыўных наступстваў «брэксіта» для эканомікі краіны, дадаў Уладзімір Пуцін.
Раней прэм'ер-міністр Расіі Дзмітрый Мядзведзеў выказаў занепакоенасць напружанай сітуацыяй на рынках і падзеннем коштаў на нафту, выкліканымі вынікамі рэферэндуму аб выхадзе Брытаніі з ЕС.
«Ужо ўпала цана на нафту. Курс фунта, еўра таксама знаходзіцца пад ціскам. Вельмі сур'ёзна павысілася валацільнасць рынку сыравіны і фондавых рынкаў. Нас, вядома, гэта не радуе. Гэта дадатковыя рызыкі для сусветнай эканомікі, а значыць, і для нашай эканомікі, якая з'яўляецца часткай эканомікі сусветнай», — сказаў Мядзведзеў.
Паводле слоў расійскага прэм'ера, ураду трэба будзе прааналізаваць наступствы брытанскага рэферэндуму і прыняць унутраныя рашэнні ў інтарэсах расійскай эканомікі.