У Верхнім горадзе па суботах ахвотных будуць вучыць хадзіць на хадулях
Мінскі форум вулічных тэатраў запускае адукацыйны праект з 4 чэрвеня, паведамілі арганізатары.
БелТА
На працягу ўсяго лета ў суботу ў Верхнім горадзе ў двары Карэтнага музея (вул. Кірылы і Мяфодзія, 8Б) пад адкрытым небам будуць праходзіць бясплатныя майстар-класы ад лепшых вулічных тэатраў Беларусі. Яны прыадкрыюць таямніцу інтэрактыўнага тэатра, навучаць перамяшчацца на хадулях, дапамогуць развіць пластыку і раскажуць шмат новага і цікавага.
Першую лекцыю 4 чэрвеня «Вулічны тэатр. Ад старажытнасці да нашых дзён» прачытае тэатразнавец Таццяна Януковіч.
У праграме праекта майстар-класы ад эксперыментальнага тэатра Eye, тэатра ўзаемадзеяння «Мусташ», тэатра танца «Альтана». Вулічны тэатр «Вір» 25 чэрвеня дасць майстар-клас па перамяшчэнні на хадулях.
За раскладам майстар-класаў можна сачыць у сацыяльных сетках, а таксама на сайце Мінскага форуму вулічных тэатраў.
Праграма будзе дапаўняцца на працягу лета.