Праваслаўны святар: Негатыўнай рэакцыі на беларускую мову няма
Айцец Аляксандр Шрамко раз у месяц ладзіць беларускамоўныя набажэнствы ў храме Архістратыга Божага Міхаіла ў сталічным мікрараёне Сухарава.
Мы папрасілі святара пракаментаваць выказванні мітрапаліта Мінскага і Заслаўскага Паўла аб тым, што «некаторыя храмы спрабавалі перайсці на беларускамоўныя набажэнствы і не знаходзілі падтрымкі ў вернікаў, і людзі проста пераставалі хадзіць туды».
Аляксандр Шрамко кажа:
«Людзей у храме не паменела. Ходзяць як на царкоўнаславянскія службы, гэтак і на беларускія. Ніякага негатыўнага стаўлення на беларускую мову я не бачыў. Ніхто не кажа, што ім гэта не падабаецца. Зразумела, што вернікі больш звыклыя да царкоўнаславянскай, але на беларускую таксама добрая рэакцыя.
У нас беларускамоўная служба па нядзелях а 9:00, самы зручны час. Адмаўляцца ад беларускай мовы не плануем, усё ідзе нармальна. Я не ведаю такіх храмаў, якія б хацелі цалкам перайсці на беларускую.
У Петрапаўлаўскім саборы ёсць беларускамоўная служба, але ідзе яна ў суботу, не галоўны дзень, і а 7-й раніцы. Таму ў нас на прыходзе мы адразу паставілі мэту, каб служба была менавіта ў нядзелю.
Я бачу яшчэ праблему ў тым, што людзей, якія хочуць чуць набажэнствы па-беларуску, дастаткова шмат, але не ўсе звяртаюцца непасрэдна да царкоўнага кіраўніцтва. А трэба канкрэтна браць і пісаць. У нашым выпадку хапіла аднаго ліста на гэтую тэму, каб мітрапаліт Павел даў сваё блаславенне на службу па-беларуску раз на месяц».
