Гутар адбіў тры пенальці запар і выцягнуў «Дынама» ў групавы этап Лігі Еўропы
Фота GEPA.
Беларусь на групавым этапе футбольных еўракубкаў, як і летась, будзе прадстаўляць адразу дзве каманды. Следам за БАТЭ еўракубкавую восень забяспечылі сабе мінскія «дынамаўцы».
У іх быў суперцяжкі матч з чэмпіёнам Аўстрыі зальцбургскім «Рэд Булам». Першая сустрэча ў Брэсце прынесла перамогу беларусам 2:0, аднак да матча ў адказ падлячыліся некаторыя лідары аўстрыйцаў.
Скажам прама, гульня «Дынама» ў асноўны час была даволі бездапаможнай. Часам магло скласціся ўражанне, што гуляюць каманды ўзроўню «Барселоны» і БАТЭ, настолькі «Рэд Бул» вазіў нашых хлопцаў.
Першы ўдар у рамку мінчукі нанеслі толькі напрыканцы другога кампенсаванага тайма. Да гэтага «Дынама» ў асноўным думала толькі пра абарону.
Першую прабоіну каманда Вука Рашавіча атрымала ўжо на 10-хвіліне. Адзначыўся вельмі жвавы японец Мінаміна. А ў другім тайме Сарыяна зрабіў лік 2:0. Гэта значыць гульня пераходзіла ў два дадатковыя таймы.
«Рэд Бул» мог забіць і болей, але ў складзе «Дынама» быў Аляксандр Гутар. Брамнік ратаваў усе 120 хвілін гульні. У кампенсаваны час, праўда, і ён не змог выратаваць каманду, але суддзя памылкова запаліў афсайд. Мабыць, гэты момант будзе перацірацца аўстрыйцамі. Цана чалавечай памылкі.
У пасляматчавых пенальці ў нас адзначыліся Бечырай, Бегуноў і Паліцевіч. Толькі Уладзімір Карыцька трапіў у штангу. А вось пенальцістаў «Рэд Була» тройчы пераіграў Аляксандр Гутар. Сапраўдны герой гульні.
«Дынама» прайграла ў асноўны час 0:2, але перамагло 3:2 па пенальці. Каманда выйшла ў групавы этап Лігі Еўропы. Заўтра, у пятніцу, адбудзецца лёсаванне. Хатнія матчы мінчукі будуць праводзіць у Барысаве.
