Бунт у «ЛНР»: Платніцкага абвінавацілі ў крадзяжы
Баевікі т.зв. «Луганскай народнай рэспублікі» ўчынілі сапраўдны ўзброены бунт супраць свайго кіраўніка Ігара Платніцкага.
sprotyv.info
Гэта адбылося пасля таго, як шараговыя тэрарысты выкрылі той факт, што Платніцкі раскрадваў расійскую гуманітарную дапамогу і прысвойваў тавары з разрабаваных супермаркетаў, перадае ўкраінскі рэсурс «Інфармацыйны супраціў».
У прыватнасці, супраць «ўладаў ЛНР» паўсталі баевікі так званага батальёна «Адэса». Яны змаглі ўзламаць склад Платніцкага, на якім захоўваецца гуманітарная дапамога і іншыя тавары, выкрадзеныя ў луганскіх супермаркетах. «Ператрус» правялі па ўсіх правілах: з вопісам знойдзенай маёмасці, відэафіксацыяй і нават запрашэннем панятых. У працэсе агляду ў памяшканні, якое належыць Платніцкаму, баевікі «Адэсы» знайшлі паддоны з цукрам і мукой, большасць з якіх раней паступалі ў «ЛНР» у расійскіх гуманітарных канвоях, а таксама проста фантастычную колькасць рознага алкаголю, у тым ліку і завезенага з акупаванага Крыма.
Зрэшты, на думку баевікоў, не ўсе тавары, знойдзеныя на падкантрольным Платніцкаму складзе прывезеныя з Расіі. Частка з іх мае ўкраінскае паходжанне і скрадзеная з разрабаваных крамаў у самым Луганску і ваколіцах. У далейшым гэтыя тавары разам з расійскай гуманітаркай неаднаразова з'яўляліся ў продажы ў сетцы магазінаў «Народны», падкантрольнай уладам «ЛНР». Уся выручка ад іх продажу насельніцтву ішла ў кішэню кіраўнікоў гэтай тэрарыстычнай арганізацыі.
