Былыя кіраўнікі «Белкамунмаша» падазраюцца ў злоўжываннях
Аператыўныя супрацоўнікі падраздзяленняў па барацьбе з эканамічнымі злачынствамі Партызанскага РУУС і ГУУС Мінгарвыканкама падазраюць у незаконнай дзейнасці былых кіраўнікоў ААТ «Кампанія — кіраўнік холдынга «Белкамунмаш».
Як паведамляе ГУУС, падчас аператыўна-вышуковых мерапрыемстваў у супрацоўнікаў службы БЭЗ з'явіліся падставы меркаваць, што ў снежні мінулага года выканаўца абавязкаў генеральнага дырэктара і намеснік генеральнага дырэктара (зараз ужо не працуюць у «Белкамунмашы»), злоўжываючы службовымі паўнамоцтвамі, арганізавалі афармленне фіктыўнай адгрузкі тралейбусаў у межах выканання дагавораў, заключаных пры правядзенні працэдуры дзяржаўнай закупкі з прадпрыемствам «Мінсктранс». Пры гэтым фактычна прадукцыя пастаўленая не была.
Паводле наяўнай інфармацыі, за нібыта паспяховае выкананне плана рэалізацыі шэрагу супрацоўнікаў ААТ былі выплачаныя неабгрунтаваныя прэміі. Урон склаў прыблізна 300 млн. рублёў.
У дачыненні да падазроных пракуратурай Партызанскага раёна Мінска распачатая справа на падставе ч. 3 арт. 424 КК (злоўжыванне ўладай або службовымі паўнамоцтвамі, што пацягнула нанясенне ўрону ў буйным памеры). Гэты артыкул прадугледжвае да 10 гадоў пазбаўлення волі з канфіскацыяй маёмасці.
