Правая рука Каламойскага заклікаў Кіеў саступаць і дамаўляцца
Інакш канфлікт ва Украіне можа пайсці па югаслаўскім сцэнары, кажа Генадзь Корбан.
«Яшчэ года не прайшло, а мы ўжо стаміліся ад гэтай вайны, — заявіў намеснік кіраўніка Днепрапятроўскай абласной дзяржадміністрацыі Генадзь Корбан у інтэрв'ю Грамадскаму тэлебачанню. — А яшчэ — некалькі гадоў, сапраўды, крывавых пару гадоў… Ёсць два выхады: першы — ваеннае вырашэнне пытання, другі — дамаўляцца. Каб дамаўляцца, трэба ўмець паглыбіцца ў дэталі і рэалізаваць іх у жыцці», — адзначыў Корбан, правая рука мільярдэра Каламойскага, што ўзначальвае Днепрапятроўскую абладміністрацыю ад моманту пачатку расійскай агрэсіі.
«Цяпер, калі выкарыстоўваць шахматную тэрміналогію, сітуацыя цугцвангу — кожны наступны зроблены крок заведама невыгадны», — дадаў Корбан.
«Мясцовыя палітыкі павінны зразумець — калі ў іх не выйшаў бліц-крыг, трэба зняць карону і дамаўляцца, як гэта робяць і ў бізнэсе. Не ведаю, з кім, магчыма і з Захарчанкам [лідар «ДНР» Аляксандр Захарчанка)», — адзначыў Корбан.
Каламойскі і Корбан выступаюць спонсарамі шэрагу добраахвотніцкіх батальёнаў, што ваююць у Данбасе на перадавой. Украінскія ўлады моцна цэняць таксама той факт, што Каламойскаму ўдалося ўтрымаць стабільнасць у Днепрапятроўску, што ператварыўся ў бастыён у тыле Данбаса.
