Заснавальнік «Арт-сядзібы» Стас Бабайцаў адпушчаны, справу накіравалі на дапрацоўку
Пратакол аб адміністрацыйным правапарушэнні на падставе арт. 17.1 КоАП (дробнае хуліганства) у дачыненні да актывіста грамадскага агенцтва «Арт-сядзіба» Станіслава Бабайцава, затрыманага ў ноч з 23 на 24 лістапада ў Мінску, адпраўлены на дапрацоўку.
Пра гэта паведаміў каардынатар «Арт-сядзібы» Мікіта Броўка.
«Стаса завялі ў залу суда, а нас не пусцілі, міліцыя зачыніла дзверы, — сказаў Броўка. —
На судзе высветлілася, што пратакол у дачыненні да яго быў складзены няправільна. У дакуменце было напісана, што ён быў у стане алкагольнага ап'янення, хаця міліцыянеры нават не вазілі яго на агляд. У выніку справу накіравалі на дапрацоўку».
Станіслаў Бабайцаў адпушчаны на волю.
Паводле слоў Броўкі, апрача Бабайцава і яго сябра міліцыянеры затрымалі прыкладна восем чалавек, якія незнаёмыя «Арт-сядзібе». «Усе яны сёння былі прыгавораныя да штрафаў», — сказаў каардынатар агенцтва, дадаўшы, што суды праходзілі аналагічна — вельмі хутка і без сведак.
Нагадаем, Бабайцаў з сябрам былі затрыманыя ў ноч з 23 на 24 лістапада ў Мінску непадалёк ад станцыі метро «Кастрычніцкая». «Супрацоўнікі міліцыі вырашылі праверыць у іх дакументы, а маладыя людзі ў сваю чаргу пацікавіліся службовымі пасведчаннямі міліцыянераў. Супрацоўнікі міліцыі гэтую просьбу расцанілі па-свойму — Бабайцава з сябрам павезлі ў Цэнтральнае РУУС сталіцы, дзе былі складзеныя пратаколы аб дробным хуліганстве. Актывіст «Арт-сядзібы» дакумент падпісваць адмовіўся.
