У Гродне створаць філіял ПВТ у помніку архітэктуры
У сакавіку 2015 года плануецца распачаць будаўніцтва філіяла Парку высокіх тэхналогій на месцы былых будынкаў Гродзенскага пагранатрада, паведаміў БЕЛТА мэр Гродна Мечыслаў Гой.
Праект у стадыі распрацоўкі, яго завяршэнне прызначанее на сакавік 2015 года, пасля чаго пачнецца будаўніцтва. Філіял меркавана займе былыя будынкі пагранатраду, таксама з боку ўнутранага дворыку будзе збудаваны новы корпус. Будынак складу ў аварыйным стане плануецца знесці. Прадугледжваецца добраўпарадкаванне бліжэйшых тэрыторый, у іх ліку берагі Гараднічанкі.
Комплекс будынкаў пагранатраду — помнік архітэктуры. Будынкі ствараліся ў 1898–1913 гг у стылі эклектыкі. Ад пачатку і да 40-х гадоў там месціўся акружны шпіталь.
У ходзе рэканструкцыі аб’ём і канфігурацыя будынкаў не зменяцца. Цэглу пачысцяць, страчаныя элементы дэкору адновяць.
Агульная плошча будынкаў, што трапяць пад рэканструкцыю — 1800 м2. У двухпавярховым будынку казармы і ў санчастцы размесціцца бізнэс-інкубатар. Былы штаб стане адміністрацыйным будынкам з адукацыйным цэнтрам. Былы клуб стане каворкінгам. У новым будынку могуць размясціць кавярню, канферэнц-залы і залы для перамоў.
Аб адкрыцці філіялу ПВТ у Гродне паведамляў у жніўні кіраўнік вобласці Уладзімір Краўцоў. Тады меркавалася, што філіял з’явіцца да канца 2014 года.
