Трэнер ХК «Віцебск» выклікаў апанента на кулачны бой
Супрацьстаянне дзвюх хакейных камандаў у беларускім чэмпіянаце перарасло ў супрацьстаянне іх галоўных трэнераў.
Жлобінскі «Металург» прымаў «Віцебск» 19 кастрычніка ў межах беларускай хакейнай экстралігі. Сустрэча адбылася напружанай — галоўны трэнер гасцей Дзмітрый Дудзік быў выдалены ўжо ў першым перыядзе. А скончыўся матч (які, дарэчы з лікам 4:0 выйграў «Металург») бойкамі на лёдзе. Гэта абурыла галоўнага трэнера гаспадароў сустрэчы Паўла Зубава.
«Згодны, што хакей — мужчынская гульня. Але мужыкамі ў камандзе павінны быць усё, уключаючы трэнераў. А тое, што зладзіў у канцоўцы трэнерскі штаб «Віцебска», складана назваць мужчынскім учынкам. Вы тады не на Восіпава кідайцеся, а, напрыклад, на Кувека, які быў гатовы пабіцца. Давайце біцца як мужыкі!? — сказаў ён на прэс-канферэнцыі пасля матча аднаму з трэнераў «Віцебска». — Уся арэна бачыла, як ваш «радыст» бегаў туды-сюды, перадаваў пасланні ад Дудзіка. Ён-та сам займаўся такімі рэчамі ў бытнасць гульцом? Вечна «смаркатым» быў».
Дзмітрый Дудзік на гэтай прэс-канферэнцыі не прысутнічаў. Аднак, ужо на наступны дзень ён выказаўся праз сайт свайго клуба.
«У першую чаргу мяне здзівіла тое, што падобнае дазваляе сабе публічны чалавек з трэнерскага цэха, які працуе ў чужой для яго краіне (Павел Зубаў – расеец). Ён проста прыйшоў у мой дом і пры ўсіх абразіў.
Дык вось, Зубаў, 12 лістапада (за дзень да зваротнай гульні), я чакаю цябе ў баксёрскім зале ў нас у Віцебску ў 20.00. Калі ты не баязлівец і дзяшоўка — ты прыйдзеш, і мы ўсё вырашым як мужыкі. Гонар маю!» – гаворыцца ў заяве Дудзіка.
У сваю чаргу, ні Зубаў, ні кіраўніцтва «Металурга» на словы трэнера супернікаў пакуль што ніяк не адрэагавала.
