Нецвярозы кіроўца-бяспраўнік збіў людзей на прыпынку ў Мінску
Нецвярозы кіроўца-бяспраўнік сёння каля 17.00 збіў людзей на прыпынку грамадскага транспарту ў мінскім мікрараёне Малінаўка, паведаміла кіраўнік прэс-службы ДАІ Мінска Таццяна Харлінская.
«Малады чалавек выехаў з двара свайго дома па вуліцы Ясеніна, 35, не справіўся з кіраваннем, выехаў на паласу сустрэчнага руху і ўрэзаўся ў прыпынак грамадскага транспарту, дзе ў гэты момант знаходзіліся людзі», - распавяла Таццяна Харлінская.
У выніку жанчына, якой на выгляд 50-55 гадоў, памерла на месцы ад атрыманых траўмаў. Мужчына (на выгляд 55 гадоў) шпіталізаваны.
Высветлена, што 22-гадовы кіроўца ў 2011 годзе быў пазбаўлены пасведчання кіроўцы за кіраванне транспартным сродкам у нецвярозым стане, у чэрвені 2014 ён зноў быў пазбаўлены правоў па той жа прычыне. Мяркуючы па знешніх прыкметах, ёсць усе падставы меркаваць, што ў гэты раз ён таксама знаходзіцца ў стане моцнага алкагольнага ап'янення.
