Макей адзначае зашоранасць еўрапейскіх палітыкаў адносна Беларусі
Міністр замежных спраў Уладзімір Макей адзначае зашоранасць еўрапейскіх палітыкаў адносна Беларусі, але лічыць, што рана ці позна Еўрасаюз адменіць аднабаковыя санкцыі.
Аб гэтым ён заявіў у інтэрв'ю праграме «Тыдзень» тэлеканала «СТБ».
Міністр, у прыватнасці, адказаў на пытанне аб сваім удзеле ў міністэрскай сустрэчы «Усходняга партнёрства» і выказаў меркаванне, наколькі змяняецца пазіцыя Захаду адносна Беларусі.
«Усходняе партнёрства» на гэтым этапе для нас з'яўляецца неабходным фарматам узаемадзеяння з Еўрапейскім саюзам. І мы маем намер прадаўжаць удзельнічаць у гэтай ініцыятыве, пакуль яна будзе адпавядаць нашым нацыянальным інтарэсам. Гэта добрая пляцоўка для давядзення свайго пункту гледжання, пашырэння рэальных праектаў, якія маглі б мець аддачу і карысць для канкрэтных грамадзян нашай краіны. Мы спакойна працуем у рамках ініцыятывы «Усходняе партнёрства» з усімі нашымі партнёрамі на постсавецкай прасторы і калегамі з Еўрапейскага саюза», - сказаў Уладзімір Макей.
«Сапраўды, апошнім часам з улікамі сітуацыі ў рэгіёне і ў свеце ў цэлым адносіны да Беларусі змяніліся ў лепшы бок, і гэта было відавочна ў ходзе майго знаходжання ў Бруселі ў час апошняга пасяджэння Савета міністраў замежных спраў краін Еўрасаюза і «Усходняга партнёрства», - сказаў міністр. - На жаль, прынцыпова падыходы да Беларусі не змяніліся. І прычыну гэтага я бачу ў існуючай дагэтуль зашоранасці еўрапейскіх палітыкаў адносна Беларусі. Мы заяўлялі аб гэтым адкрыта і ў ходзе пасяджэння. Але я думаю, што час, у любым выпадку, лечыць, і рана ці позна Еўрасаюз адменіць аднабаковыя санкцыі адносна Беларусі, як мы таго і патрабуем».
«Цяпер для нас важна стварэнне нармальнай пазітыўнай атмасферы для далейшага развіцця нашага гандлёва-эканамічнага супрацоўніцтва з Еўрапейскім саюзам, таму што Еўрапейскі саюз для нас з'яўляецца другім важным партнёрам пасля Расіі, і мы маем намер будаваць сваю работу з ім на аснове раўнапраўнага, спакойнага, паважлівага дыялогу, не адступаючыся ад сваіх прынцыпаў і нацыянальных інтарэсаў», — дадаў кіраўнік знешнепалітычнага ведамства.-
