Знайсці
23.07.2014 / 17:3570РусŁacБел

Tut.by: У Мінску нявечаць машыны з расейскай сімволікай ФОТЫ

«Ніколі не бачыў, каб у Беларусі так не любілі рускіх!» — усклікае 23-гадовы Міша, які даслаў у рэдакцыю фатаграфіі свайго пакарабачанага Mersedes.

Міша, хоць і беларус, але нямала працаваў у Расіі, любіць гэтую краіну, асабліва за гульню зборнай па хакеі. У знак асаблівага стаўлення ездзіць з расійскай сімволікай «на борце». У апошні час гэтую сімволіку сталі зрываць, а машыну — нявечыць. З такой жа агрэсіяй сутыкаюцца ў Мінску і расіяне.

Вечарам 20 ліпеня Міша ўбачыў сваю пашкоджаную машыну на стаянцы каля Парку Горкага. «Былі прабітыя два бакавыя колы. На шынамантажы мне сказалі, што ў колах —тры дзіркі шылам зрабілі. У мяне машына яркая. Сцяжкі расійскія на капоце, па баках налепкі ў колер сцяга расійскага. Іх таксама шылам здзіралі.

На шынамантажы нават не здзівіліся, распавялі, што я не першы такі. Майстар распавёў, што да нас чалавек на рускіх нумарах прыязджаў з такімі ж трыма дзіркамі, адзін у адзін. Той кліент, аказалася, прыехаў латаць дзіркі, а на наступны дзень яму яшчэ раз прабілі, і ён зноў быў вымушаны ехаць мяняць шыны,

— распавёў Міша. У панядзелак ён напісаў заяву ў Партызанскі РУУС Мінска.

Спроба садраць налепку з трыкалорам з адных дзвярэй…

 

І з другіх…

Малады чалавек — беларус, аднак шмат часу працаваў у Расіі, там у яго шмат сваякоў. Ён і яго бацькі лічаць, што вандалізм у дачыненні да машын з расійскай сімволікай звязаны з падзеямі ва Украіне.

«Кажуць, што зараз рускіх не любяць. А чаго не любіць? Правільна, яны падтрымліваюць свайго прэзідэнта. Але нават калі вы хочаце падтрымаць Украіну, то падтрымка Украіны не павінна выяўляцца ў тым, каб зрабіць іншаму народу дрэнна. Гэта не падтрымка. Падтрымка — гэта звярнуцца да дзяржавы. Звяртайцеся да Пуціна! Навошта вы рускім робіце дрэнна? Я ўвогуле заўзятар, я не нацыяналіст. Я не лезу ў палітыку! — кажа Міша.

 

Месцы праколаў пазначаныя крэйдай.

На яго думку, пытанні палітычныя павінны вырашаць на ўзроўні ўрадаў і прэзідэнтаў, а не на ўзроўні простых людзей. «Няхай урады вырашаюць, хто там каму павінен, хто вінаваты і г.д. — кажа малады чалавек, дадаючы, што «раней такога ў Беларусі ніколі не было».

«Я не думаў, што такое стаўленне да рускіх у нас наогул можа быць, хоць першая «ластаўка» была ў траўні», — кажа Міша. Менавіта падчас чэмпіянату свету па хакеі ён упершыню ўбачыў агрэсію ў адносінах да расійскай сімволікі.

Тады Міша распавядаў, што ў адзін з вечароў вымушаны быў хавацца ў машыне, бо яго ледзь не пабілі. Акрамя таго, з машыны сарвалі ўсе расійскія сцягі.

Але заяву ў міліцыю ён напісаў толькі пасля апошняга выпадку: «Я бачу, што гэтае хуліганства становіцца рэгулярнымі», — кажа ён.

Міша кажа, што і далей будзе ездзіць з расійскай сімволікай.

У сярэдзіне траўня шыны ў машыне з расійскімі нумарамі прабілі супермадэлі Кацярыне Даманьковай.

Яна ўбачыла ля пад'езда сваю машыну з прабітымі шынамі і пабітым шклом. Побач стаялі машыны з беларускімі нумарамі, якія не пацярпелі.

«Што гэта, людзі? Адкуль у вас столькі нянавісці? Чаму з-за такіх вырадкаў я павінна сябе адчуваць небяспечна ў маёй Беларусі? Гэтая краіна не для падонкаў. <…> Мяне вырашаюць пакараць за тое, што я звязаная з Расіяй. Так будзьце вы не звязаныя з ёй 1000 разоў! Ваша пакаранне ўжо грукаецца да вас у дзверы ў выглядзе барадатай «жанчыны» - пісала тады мадэль у сваім Instagram.

Яшчэ адзін малады чалавек — 28-гадовы Міхаіл — некалькі гадоў таму прыехаў у Беларусь з Расіі. Цяпер у яго беларускі пашпарт, а на машыне хоць і беларускія нумары, сімволіка — расейская. У той жа дзень, што і 23-гадовы Міша, ён выявіў дзірку ад кулі ў лабавым шкле. «Упершыню такое бачу, — кажа Міхаіл. — Ніколі ў Беларусі не было раней такой варожасці».

Кацярына Сінюк, Tut.by

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера