Беларуская турфірма зняла рэкламны матэрыял «з-за падтрымкі ўкраінскіх бандэраўцаў»
Лілія Кобзік — галоўны рэдактар газеты «Туризм и отдых» — напісала артыкул аб тым, як весці сябе за мяжой, каб вас не прынялі за рускага турыста і не пабілі. Нагодай стала бойка ў турэцкім гатэлі між украінскім і рускім турыстамі.
У выніку гэты артыкул не спадабаўся рэкламадаўцам з турфірмы «Ирианна», бо, па іх словах, у ім «падтрымліваюцца ўкраінскія бандэраўцы і гнабяцца нашыя рускія браты». Артыкул Кобзік былі вымушаны з сайта зняць.
Мы пазванілі ў турфірму «Ирианна» і запыталіся, чым яны кіраваліся, калі казалі, што артыкул абараняе ўкраінскіх бандэраўцаў.
Спачатку адказала маладая дзяўчына і сказала, што ад самага пачатку іх проста «няправільна зразумелі». А артыкул іх абурыў з-за таго, што ў ім ідзе знявага беларусаў, пра якіх «пішуць як пра маўклівых, бесхрыбетных істот».
Пасля слухаўку ўзяў непасрэдна кіраўнік турфірмы, які і папрасіў артыкул зняць.
«Аўтар напісаў абсалютна неадэкватны артыкул, у якім казалася пра тое, што беларускай нацыі не існуе, а беларусаў ні на што не здольныя. Я такое трываць не магу. Бо я грамадзянін Беларусі і не дазволю, каб пра маю краіну так пісалі.
Перадайце гэтай даме даслоўна, што я не супраць украінцаў, я супраць тых прафашысцкіх партый, якія занялі ўрад. Я супраць гэтых партый і супраць вайны, якую яны там развязалі. І пункт гледжання ЗША і Захаду я тут падтрымліваць не буду, не дзеля гэтага мае дзяды ваявалі».
На пытанне: «Чаму на сайце турфірмы замест «Беларусі» напісана «Белоруссія»? — мужчына толькі папрасіў прабачэнні за недасведчанасць рэдактара сайту і паабяцаў хутка выправіць гэтую недарэчнасць.