Прэм'ер-міністр Мазамбіка прыбыў у Беларусь з афіцыйным візітам
Прэм'ер-міністр Мазамбіка Альберту Вакіна прыбыў у Беларусь з афіцыйным візітам.
Альберту Вакіна будзе знаходзіцца ў Беларусі 21-24 ліпеня. У час візіту запланаваны ў тым ліку перагаворы з прэм'ер-міністрам Беларусі Міхаілам Мясніковічам, па выніках якіх чакаецца падпісанне міжнародных дакументаў.
Таксама Альберту Вакіна наведае шматфункцыянальны комплекс «Мінск-Арэна», Мінскі трактарны завод, прадпрыемства «Азярыцкі-Агра», Мірскі і Нясвіжскі замкі. У час візіту Беларуская гандлёва-прамысловая палата (БелГПП) правядзе беларуска-мазамбікскую бізнес-сустрэчу і кантактна-кааперацыйную біржу паміж прадстаўнікамі дзелавых колаў дзвюх краін. Чакаецца, што ў ёй прымуць удзел міністр гандлю і прамысловасці гэтай дзяржавы Усходняй Афрыкі Арманда Інрога, прадстаўнікі кіраўніцтва БелГПП і Канфедэрацыі гандлёвых асацыяцый Мазамбіка.
Пройдуць прэзентацыі эканамічнага і экспартнага патэнцыялу Беларусі і Мазамбіка, Цэнтра па садзейнічанні інвестыцыям і Цэнтра па развіцці сельскай гаспадаркі Мазамбіка. Плануецца падпісанне мемарандума аб узаемаразуменні паміж БелГПП і Канфедэрацыяй гандлёвых палат Мазамбіка.
