Не капітуляцыя Украіны — у Ватыкане патлумачылі рэзанансную заяву Папы наконт вайны
Папа Францішак, гаворачы аб вайне ва Украіне, выкарыстоўваў фразу «белы сцяг», не маючы на ўвазе, што ўкраінцам трэба капітуляваць. Словы пантыфіка растлумачыў дырэктар прэс-службы Ватыкана Матэа Бруні.
Папа Францішак. Фота: AP Photo / Alessandra Tarantino
Вобраз «белага сцяга» ў часе гутаркі з пантыфікам выкарыстаў інтэрвʼюер, і Папа ў адказ ужыў прапанаваную фразу, каб ёю пазначыць перамірʼе, якога можна дамагчыся «дзякуючы адвазе перамоваў», публікуе Vatican News словы дырэктара прэс-службы Ватыкана Матэа Бруні.
Сваімі словамі Папа меў намер прасіць пра спыненне агню і аднаўленне мужнасці перамоваў, пра «стварэнне ўмоў для дыпламатычнага рашэння ў пошуках справядлівага і трывалага міру».
«У іншым месцы інтэрвʼю, гаворачы аб іншай канфліктнай сітуацыі, але маючы на ўвазе любую ваенную сітуацыю, Папа дакладна заявіў: «Перамовы ніколі не зʼяўляюцца капітуляцыяй», — падкрэсліў ён.
Пантыфіка ў інтэрвʼю швейцарскай тэлерадыёкампаніі спыталі, якую ён мае пазіцыю ў дэбатах паміж тымі, хто кажа, што Кіеў павінен здацца, бо нібыта «не змог даць адпор» расійскім акупантам, і людзьмі, якія ўпэўнены, што такім чынам агрэсіўныя дзеянні Расіі будуць узаконены. Пры гэтым інтэрвʼюер выкарыстоўваў фразу «белы сцяг».
Папа адказаў: «Я лічу, што мацнейшым будзе той, хто глядзіць на сітуацыю, думае пра людзей, мае смеласць падняць белы сцяг і весці перамовы». Ён дадаў, што перагаворны працэс павінен адбыцца з дапамогай іншых краін. Гэтая фраза выклікала вялікі рэзананс.
Чытайце таксама:
Папа Францішак атрымаў у дар копію абраза Маці Божай Жыровіцкай
Прэзідэнт Аргенціны сустрэўся з папам Францішкам, якога ён называў імбецылам
Пуцін павіншаваў з Новым годам толькі трох еўрапейскіх лідараў. І Лукашэнку
