На Лагойшчыне выратавалі ад замярзання 56 расійскіх турыстаў
Увечары 7 студзеня на трасе Мінск-Віцебск зламаўся аўтобус з расійскімі турыстамі. На той момант на вуліцы было каля 26 градусаў марозу. Пасажыраў адправілі ў гасцініцу, паведамляе Мінскае абласное ўпраўленне МНС.
Фота mchs.gov.by
7 студзеня каля 17 гадзін на аўтадарозе Мінск—Віцебск, непадалёк ад вёскі Слагавішча Лагойскага раёна, зламаўся аўтобус з пасажырамі. Адзін з іх звязаўся з ратавальнікамі.
Высветлілася, што транспарт стаў праз замярзанне пнеўмасістэмы.
Аўтобус «Неаплан», які належыць расійскай арганізацыі, вяртаўся з экскурсійнага тура па Мінску ў Пскоў. У аўтобусе знаходзіліся 2 кіроўцы і 54 пасажыры, з іх 7 дзяцей. Усе грамадзяне Расійскай Федэрацыі.
Да месца паломкі выехалі старшыня Лагойскага райвыканкама, кіраўніцтва Лагойскага райаддзела па НС і экіпаж ДАІ Лагойскага РАУС. Тэмпература паветра на той момант складала каля 26 градусаў марозу. Для перавозкі расійскіх турыстаў у бяспечнае месца паслалі аўтобус «Мінаблаўтатранса». У 18.15 людзей даставілі ў гасцініцу спартыўна-турыстычнага комплексу «Алімп» у Лагойску.
Аўтобус з турыстамі і транспарт «Мінаблаўтатранса». Фота mchs.gov.by
8 студзеня ў 04.35 раніцы на прадастаўленым перавозчыкам дадатковым аўтобусе пасажыры працягнулі рух у Пскоў.
