Шварцэнэгер зноў стаў тэрмінатарам — і зноў з рукой без скуры ВІДЭА
У трэйлеры фільма «Тэрмінатар. Генэзіс» актор Арнольд Шварцэнэгер паўтарыў славутую сцэну агалення сталёвага шкілета робата-забойцы T-800.
Пяты фільм у сусвеце тэрмінатараў стане пачаткам новай трылогі, перазапускам серыі. Яго прэм’ера прызначаная на 2 ліпеня 2015 года.
Галоўныя ролі выканалі Арнольд Шварцэнэгер, Эмілія Кларк (вядомая як Даенэрыс з «Гульні тронаў»), Джэйсан Кларк і Джай Кортні. «Злым» вадкаметалёвым тэрмінатарам Т-1000 стаў карэец Лі Бён Хон.
Джэймс Кэмеран, рэжысёр першых двух «Тэрмінатараў», выступіў кансультантам у «Генэзісе», але яго імя не будзе пазначанае ў тытрах.
Рэжысёрскае крэсла заняў Алан Тэйлар, збольшага вядомы як рэжысёр серыялаў (самы маштабны поўнаметражны фільм — «Тор 2»).
«Генэзіс» распавядзе гісторыю арыгінальнага «Тэрмінатара» наноў. Джон Конар, кіраўнік супраціву ў вайне з машынамі, дасылае ў мінулае лейтэнанта Кайла Рыза, каб той уратаваў Сару Конар, маці Джона. Але Кайл знаходзіць зусім не тое, да чаго яго рыхтавалі.
Сара Конар ужо выхаваная тэрмінатарам-Шварцэнэгерам.
Тэрмінатар быў адасланы ў ранейшы за Кайла час, каб бараніць дзяўчыну і рыхтаваць яе да лёса, які яна адмаўляе. Многія падзеі арыгінальнага «Тэрмінатара» адбудуцца і ў «Генэзісе», але пойдуць зусім іншым чынам.
Пасля «Генэзіса» выйдуць два сіквэлы: 19 мая 2017 года і 29 чэрвеня 2018 года. Бюджэт «Генэзіса» склаў 170 млн даляраў.
