Са згоды савета рэспублікі сенатарка з Віцебска затрыманая па падазрэнні ў злоўжыванні
Следчы камітэт вынес пастанову аб затрыманні Ганны Шарэйкі.
Ганна Шарэйка. Фота sovrep.gov.by.
Як паведаміў прадстаўнік Следчага камітэта Сяргей Кабаковіч, вынесена пастанова пра затрыманне дырэктара Віцебскай бройлернай птушкафабрыкі, якая з’яўляецца членам савета рэспублікі.
«У сувязі з тым, што гэтая службовая асоба з’яўляецца членам савета рэспублікі і карыстаецца дэпутацкай недатыкальнасцю, матэрыялы, якія даказваюць яе датычнасць да здзяйснення супрацьпраўнага дзеяння, былі прадстаўлены ў вызначаным парадку на пазачарговую сесію савета рэспублікі», - адзначыў Кабаковіч.
Адразу паля гэтага адбылося затрыманне.
Пазачарговая сесія праходзіла 14 жніўня.
Дырэктарам Віцебскай бройлернай птушкафабрыкі з’яўляецца Ганна Шарэйка. Яе вінавацяць у злоўжыванні службовымі паўнамоцтвамі.
Ганна Шарэйка нарадзілася ў 1960 годзе ў в. Антопалье Чашніцкага раёна Віцебскай вобласці. Скончыла Віцебскі ветэрынарны інстытут, Усерасійскі навукова-даследчы і тэхналагічны інстытут птушкагадоўлі. Кандыдат сельскагаспадарчых навук.
Працавала ў саўгасе «Слідчаны» Чашніцкага раёна, у аб’яднанні «Белсяльгастэхніка». Кар’еру на Віцебскай бройлернай птушкафабрыцы пачала з пасады аператара.
Узнагароджана ордэнам Пашаны, медалём «За працоўныя заслугі». Пераможца рэспубліканскага конкурсу «Жанчына года-2008» у намінацыі «За высокі прафесіяналізм».
З’яўлялася членам пастаяннай камісіі савета рэспублікі па міжнародных справах і нацыянальнай бяспецы. У члены СР пятага склікання вылучалася ад Віцебскага, Гарадоцкага, Дубровенскага і Лёзненскага раёнаў.
Абіралася ў савет рэспублікі і чацвёртага склікання.